Reading Article
Public date : 11, Dec 2023 (46,290 Read)
ពាក្យទូន្មានឪពុកដល់កូនប្រុសស្រី
|
|
|
ពាក្យទូន្មានឪពុកដល់កូនប្រុសស្រី
ត្រូវជាមនុស្សដូចតទៅ កូនស្រីឪ ត្រូវជាមនុស្ស មិនរឹងត្អឹង តែបើរឹង ត្រូវរឹងប៉ឹង ប្រឹងសិក្សា កូនប្រុសឪ ត្រូវជាមនុស្ស មានប្រាជ្ញា ព្រះផ្តាំថា កុំស្នេហា ស្រាស្រីល្បែង ។ កូនស្រីឪ ត្រូវជាមនុស្ស មិនជាប់នុយ កុំស្នេហ៍លុយ ស្អុយកេរ្តិ៍ឈ្មោះ រស់ដូចផ្សែង កូនស្រីឪ ត្រូវជាមនុស្ស ចេះខ្លាចក្រែង ព្រះសម្តែង ឲ្យទម្លាប់ ជាប់សីលវិញ ។ កូនប្រុសឪ ត្រូវជាមនុស្ស ចេះស្មោះត្រង់ កុំតាមចង់ ក្រែងមិនសុខ ទុក្ខម្នោម្នេញ កូនប្រុសឪ ត្រូវជាមនុស្ស តាមចេះវិញ ប្រឹងបំពេញ ធម៌សន្តោស ប្រោសមេត្តា ។ កូនស្រីឪ ត្រូវជាមនុស្ស មិនប្រមាទ ជាស្រីឆ្លាត ចេះប្រមើល មើលកិច្ចការ កូនស្រីឪ ត្រូវជាមនុស្ស ទន់ចរិយា កូនស្រីឪ ត្រូវជាមនុស្ស ទន់ចរិយា តែយ៉ាងណា សូមស្រីម៉ុម កុំទន់ខ្សោយ ។ កូនប្រុសឪ ត្រូវជាមនុស្ស ទន់ចរិយា តែយ៉ាងណា សូមស្រីម៉ុម កុំទន់ខ្សោយ ។ កូនប្រុសឪ ត្រូវជាមនុស្ស មិនថយក្រោយ កុំចាំឲ្យ មនុស្សស្រីច្រាន បានទៅមុខ ។ កូនស្រីឪ ត្រូវជាមនុស្ស មិនឡេះឡោះ ពាក្យពីរោះ មានរបៀប រៀបទំនុក កូនស្រីឪ ត្រូវជាមនុស្ស រក្សាសុខ បើខ្លាចទុក្ខ កុំជាមនុស្ស ទ្រុស្តសីលធម៌ ។ កូនប្រុសឪ ត្រូវជាមនុស្ស ចេះស្គាល់ខ្លួន ចិត្តមាំមួន មិនអំនួត អួតខ្ទារខ្ទ័រ កូនប្រុសឪ ត្រូវជាមនុស្ស មិនញាប់ញ័រ ជួបលោកធម៌ ត្រូវពិចារណ៍ ថាមិនទៀង ។ កូនស្រីឪ ត្រូវជាមនុស្ស ចេះដឹងគុណ ជាដើមទុន នៃជីវិត ពិតជាស្បៀង កូនស្រីឪ ត្រូវជាមនុស្ស មិនលំអៀង សម្តីទៀង ពិតប្រាកដ មាត់ក្រអូប ។ កូនប្រុសឪ ត្រូវជាមនុស្ស ចេះចាប់ផ្តើម កុំច្បិចច្បើម ត្រូវប្រឹងប្រែង ក្រែងខ្វះហូប កូនប្រុសឪ ត្រូវជាមនុស្ស មិនចេះល្មោភ តែបើទ្រោប ទ្រាលដល់ខ្ជិល រិលបញ្ញា ។ កូនស្រីឪ ត្រូវជាមនុស្ស មិនច្រណែន រៀបបែបផែន ជាមង្គល ដល់គ្រួសារ កូនស្រីឪ ត្រូវជាមនុស្ស មានមេត្តា មិនឥស្សា ក្នុងជីវិត ពិតជាស្ងប់ ។ កូនប្រុសឪ ត្រូវជាមនុស្ស ដឹងប្រមាណ ក្នុងខ្លួនប្រាណ រាល់យប់ថ្ងៃ លៃឲ្យគាប់ កូនប្រុសឪ ត្រូវជាមនុស្ស មិនអភ័ព្វ មិនត្រូវជាប់ គ្រឿងញៀនញ៉ាម កាមគុណ៥ ។ កូនប្រុសស្រី កុំជាមនុស្ស ទ្រុស្តមិត្តភក្តិ កុំជំពាក់ ទ្រព្យបំណុល បុលបញ្ចាំ កុំរ៉ាប់រង ធានាទ្រព្យ ជាប់គ្រោះកម្ម ឪសូមផ្តាំ កម្មវេរា ជាគ្រោះកាច ។ កូនប្រុសស្រី កុំជាមនុស្ស ទ្រុស្តសីលា កុំគិតថា សីលនេះណា ខ្លាកំណាច តាមពិតសីល ជាទេវតា ក្លាអង់អាច មានអំណាច អាចប្រហារ ខ្លាកិលេស ។ កូនប្រុសស្រី កុំជាមនុស្ស ទ្រុស្តមាតា ស្រីនេះណា ជាព្រះព្រហ្ម កុំប្រហែស តែព្រហើន ហ៊ានឃោរឃៅ ត្រូវភ្លើងឆេះ ជាតិអ្នកចេះ ត្រិះរិះដឹង ប្រឹងបូជា ។ កូនប្រុសស្រី កុំជាមនុស្ស ទ្រុស្តបិតា ត្រូវដឹងថា ប្រុសនេះណា ជាព្រហ្មា បានសុខហើយ ក្នុងជំរំ ព្រហ្មវិហារ ត្រូវម្នីម្នា ភ្ញាររលឹក នឹកតបគុណ ។ កូនប្រុសស្រី កុំជាមនុស្ស ទ្រុស្តព្រះពុទ្ធ ត្រូវលំអុត កាយវាចា ប្រាថ្នាបុណ្យ កូនមានទាន សីលភាវនា ជាដើមទុន កូនប្រុសស្រី កុំជាមនុស្ស ទ្រុស្តព្រះធម៌ កុំជាប់ជ័រ នៃកាមគុណ ស៊ុនក្នុងគុក ប្រឹងដើរតាម ស្នាមព្រះបាទ ព្រះជាន់ទុក កុំសម្រុក ធ្វើដំណើរ ដើរផ្លូវមារ ។ កូនប្រុសស្រី កុំជាមនុស្ស ទ្រុស្តព្រះសង្ឃ ត្រូវនឹកត្រង់ អង្គសាវ័ក ព្រះភគវា ទ្រង់សាសនា ព្រះជិនស្រី ល្បីខ្ទរខ្ទារ ក្រងធម្មា ជាបិដក វិ.សុ.អ. ។ -កូនមាសឪពុកទាំងឡាយអើយព្រះធម៌មានហើយកុំធ្វើខ្វាក់ប្រឹងអានប្រឹងគិតឲ្យប្រចក្ស ខណៈដ៏ល្អកុំកន្លង ។ -ថ្ងៃ១៥កើតខែពិសាខ ជាថ្ងៃសម្រាកធ្វើបុណ្យឆ្លង ព្រះពុទ្ធទ្រង់កើតជាចម្បង ចម្លងសត្វលោកផុតភពបី ។ -ថ្ងៃ១៥កើតខែអាសាល កូនឪពុកត្រូវឆ្លាតយល់សេចក្តី ថ្ងៃនេះជាថ្ងៃព្រះជិនស្រី ចាប់ផ្តើមពោលស្តីត្រាស់ទេសនា ។ - ជាថ្ងៃកំណើតនៃព្រះធម៌ ស្តាប់ហើយតាំងគភ៌ដ៏ថ្លៃថ្លា ដល់ពេលប្រសូតបានសោតា ផុតចាកទុក្ខាក្នុងអបាយ ។ - ថ្ងៃដែលព្រះសង្ឃមានកំណើត ថ្ងៃ១៥កើតមិនមែនឆ្ងាយ គឺថ្ងៃតែមួយដែលធម្មកាយ ចាប់ផ្តើមផ្សព្វផ្សាយដោយព្រះពុទ្ធ ។ - ព្រះពុទ្ធព្រះធម៌និងព្រះសង្ឃ កូនត្រូវឳនអង្គយ៉ាងលំអុត គោរពបូជាដោយមោះមុត ប្រសើរបំផុតត្រង់ចិត្តស្អាត ។ -ថ្ងៃ១៥កើតមាឃបូជា អង្គព្រះភគវាទ្រង់ឳវាទ ប្រាប់បេះដូងធម៌ក្នុងសន្និបាត គឺជាឳគ្រប់គ្នាប្រញាប់ក្រោក ទៅវត្តស្តាប់ធម៌បាតិមោក្ខ កុំឲ្យចាញ់បោកមារក្នុងខ្លួន ។ -រៀបចំភ្ញីផ្កាគ្រឿងបូជា សំពះវន្ទាឲ្យស៊ប់សួន ធ្វើទានកាន់សីលឲ្យខ្ជាប់ខ្ជួន គំនុំគុំគួនកុំមាន ។ អត្តបទនេះដកស្រង់ចេញពីសៀវភៅៈ កូនមាសឪពុក រៀបរៀងដោយៈ អគ្គបណ្ឌិត ធម្មាចារ្យ ប៊ុត សាវង្ស វាយអត្តបទដោយៈ កញ្ញា ជា ម៉ានិត ដោយ៥០០០ឆ្នាំ |
Articles you may like
