Reading Article
Public date : 25, Dec 2023 (8,694 Read)
ជាតិមនុស្សថ្លៃមិនគប្បីធ្វើអំពើថោក
|
|
|
ជាតិមនុស្សថ្លៃមិនគប្បីធ្វើអំពើថោក
ហីនំ ធម្មំ ន សេវេយ្យ បមាទេន ន សំវសេ មិច្ឆាទិដ្ឋឹ ន សេវេយ្យ ន សិយា លោកវឌ្ឍនោ។ បុគ្គលមិនគួរសេពនូវធម៌ដ៏ថោកទាប មិនគួរនៅរួមជាមួយសេចក្តីប្រមាទ មិនគួរ សេពនូវមិច្ឆាទិដ្ឋិ មិនគួរជាមនុស្សចង្អៀត លោកឡើយ ។ ព្រះអង្គទ្រង់គង់ប្រថាប់នៅជេតវនារាម ទ្រង់ប្រារឰភិក្ខុកម្លោះមួយអង្គដែលឈ្លោះគ្នាជាមួយនឹង ចៅស្រីរបស់ឧបាសិកាវិសាខា ។ ខ្លួនជាទីពឹងរបស់ខ្លួនឯង
អត្តា ហិ អត្តនោ នាថោ កោ ហិ នាថោ បរោ សិយា អត្តនា ហិ សុទន្តេន នាថំ លភតិ ទុល្លភំ ។ ខ្លួនហ្នឹងហើយជាទីពឹងរបស់ខ្លួន បុគ្គលដទៃជាទីពឹងដូចម្តេចបាន ព្រោះបុគ្គល ដែលអប់រំខ្លួនបានល្អហើយ រមែងបាននូវ ទីពឹង ដែលគេបានដោយកម្រ ។ ព្រះអង្គទ្រង់គង់ប្រថាប់នៅជេតវនារាម ទ្រង់ប្រារឰមាតាព្រះកុមារកស្សបៈដែលប្រសូតបុត្រក្នុងភាពនៃខ្លួនជាភិក្ខុនី។ មនុស្សទ្រុស្តសីលគឺជាចោរបៀតបៀនខ្លួនឯង
យស្ស អច្ចន្តទុស្សីល្យំ មាលុវា សាលមិវោត្ថតំ ករោតិ សោ តថត្តានំ យថា នំ ឥច្ឆតី ទិសោ ។ ភាពជាអ្នកទ្រុស្តសីលហួសកម្រិត បាន គ្របសង្កត់នូវអត្តភាពនៃបុគ្គលណា ដូចជាវល្លិ- ជ្រៃ រួបរឹតព័ទ្ធព័ន្ធដើមសាលព្រឹក្ស យ៉ាងនោះ ឯង បុគ្គលនោះ ឈ្មោះថា ធ្វើខ្លួនឯងឱ្យវិនាស ដូចជាចោរអ្នកប្រាថ្នាធ្វើនូវសេចក្តីវិនាសឱ្យដល់ អ្នកដទៃ ដូច្នោះដែរ ។ ព្រះអង្គទ្រង់គង់ប្រថាប់នៅវេឡុវនារាម ទ្រង់ប្រារឰព្រះទេវទត្តដែលទ្រុស្តសីលប្រព្រឹត្តតាមអំណាចតណ្ហា ។ មនុស្សអាក្រក់ធ្វើល្អបានដោយលំបាក
សុករានិ អសាធូនិ អត្តនោ អហិតានិ ច យំ វេ ហិតញ្ច សាធុញ្ច តំ វេ បរមទុក្ករំ ។ អំពើអាក្រក់ និងអំពើឥតប្រយោជន៍ ដល់ខ្លួនឯង មនុស្សអាក្រក់ធ្វើបានដោយ ងាយ អំពើណាមានប្រយោជន៍ផង ល្អប្រពៃ ផង អំពើនោះ មនុស្សអាក្រក់ធ្វើបានដោយ កម្រណាស់ ។ ព្រះអង្គទ្រង់គង់ប្រថាប់នៅវេឡុវនារាមទ្រង់ប្រារឰការព្យាយាមបំបែកសង្ឃរបស់ភិក្ខុទេវទត្ត ។ ជាតិជាបព្វជិតចិញ្ចឹមជីវិតដោយបិណ្ឌបាត
ឧត្តិដ្ឋេ នប្បមជ្ជេយ្យ ធម្មំ សុចរិតំ ចរេ ធម្មចារី សុខំ សេតិ អស្មឹ លោកេ បរម្ហិ ច។ បព្វជិត មិនគួរប្រមាទក្នុងបិណ្ឌបាត ដែលខ្លួនត្រូវក្រោកឡើង ឈរចាំទទួលឡើយ បុគ្គលគួរប្រព្រឹត្តធម៌ឱ្យសុចរិត អ្នកដែលប្រព្រឹត្ត ធម៌ជាប្រក្រតី រមែងនៅជាសុខ ក្នុងលោក នេះផង ក្នុងលោកខាងមុខផង ។ ព្រះអង្គទ្រង់គង់ប្រថាប់នៅនិគ្រោធារាម ទ្រង់ប្រារឰព្រះបាទសិរីសុទ្ធោទនៈដែលទាស់ព្រះទ័យនឹងព្រះអង្គទ្រង់យាងបិណ្ឌបាត។ ដកស្រង់ចេញពី "សៀវភៅព្រះពុទ្ធភាសិត ៤៣គាថា" រៀបរៀងដោយ អគ្គបណ្ឌិត ធម្មាចារ្យ ប៊ុត-សាវង្ស ដោយ៥០០០ឆ្នាំ |
Articles you may like
