Reading Article
Public date : 27, Jul 2019 (13,401 Read)
ការងារមានតម្លៃចំពោះមនុស្សនៅត្រង់ណា?
|
|
|
ទ្រព្យសម្បត្តិជាលទ្ធផលរបស់ការងារក៏ពិតមែនហើយ ប៉ុន្តែទ្រព្យសម្បត្តិមិនមែនអាចជួយឲ្យមនុស្សអស់ការសៅហ្មងបានឡើយ បើបាត់បង់ស្មារតី បុរសស្រី្តនឹងដល់នូវសេចក្តីសៅហ្មងដោយសារទ្រព្យសម្បត្តិនោះឯង សូមមនុស្សទាំងអស់គ្រប់គ្នា កុំធ្វើការងារ ដើម្បីទ្រព្យសម្បត្តិតែម្យ៉ាងឲ្យសោះ តែត្រូវធ្វើការងារដើម្បីរំដោះខ្លួនឯងឲ្យរួចអំពីការសៅហ្មង ប្រៀបបីដូចពពួកប្រេតដែលសុំឲ្យញាតិធ្វើបុណ្យឧទ្ទិសឲ្យ ដើម្បីខ្លួនបានរួចអំពីទីដ៏ថោកទាបដូច្នោះឯង នេះជាតម្លៃនៃការងារ ដែលមានសម្រាប់មនុស្សគ្រប់គ្នា យើងអាចធ្វើបុណ្យឧទ្ទិសឲ្យដល់ប្រេតជាញាតិ សុំឲ្យពួកប្រេតជាញាតិ រួចចាកអំពីឋានដែលបានទៅកើតជាប្រេតនោះ ប៉ុន្តែសូមមនុស្សលោកកុំភ្លេចធ្វើបុណ្យឧទ្ទិសឲ្យខ្លួនឯង ដើម្បីខ្លួនឯងបានរួចអំពីមនុស្សប្រេតក្នុងជាតិនេះផង ។
អ្នកដទៃធ្វើល្អមកលើយើង គឺវាល្អពិតហើយ ប៉ុន្តែមិនមែនជាអំពើល្អរបស់យើងឡើយ មនុស្សមិនមាននូវអំពើល្អខ្លួនឯង មិនអាចជួយខ្លួនឯងបានទេ ទាំងអ្នកដទៃក៏មិនអាចជួយបានដែរ ។ គុណតម្លៃនៃការងារមនុស្សគ្រប់គ្នាត្រូវសិក្សាស្វែងយល់ឲ្យបានប្រាកដច្បាស់ បើពុំដូច្នោះទេ ប្រាកដជាយល់ថាការងារបម្រើតណ្ហា ជាការងារមានតម្លៃទៅវិញ ។ ដើម្បីឲ្យបានត្រាស់ដឹងជាព្រះសម្មាសម្ពុទ្ធ ព្រះបរមពោធិសត្វបានធ្វើការងារច្រើនណាស់ ទាំងឋិតនៅក្នុងពេលវេលាដ៏យូរអង្វែងក្រៃលែង គ្រប់ការអស្ចារ្យនៃព្រះសម្មាសម្ពុទ្ធជាម្ចាស់ គឺជាលទ្ធផលនៃការងារដែលព្រះអង្គបានធ្វើ កាលដែលព្រះអង្គនៅជាព្រះពោធិសត្វនៅឡើយ ។ ក្នុងពេលនោះ យើងមិនអាចធ្វើជាព្រះពុទ្ធបានទៅបានទេ ប៉ុន្តែយើងអាចធ្វើនូវការងារ ដែលការងារនោះអាចជួយឲ្យយើងបានដល់នូវឋានៈ ដែលយើងត្រូវការ ។ នៅក្នុងលោកនេះ មិនមានអ្វីដែលយើងបានមកដោយឯងៗ ដែលមិនមានជាលទ្ធផលនៃការងាររបស់ខ្លួនឯងនោះទេ គ្រាន់តែថា ការងារនោះ មានការងារខ្លះយើងបានធ្វើហើយក្នុងជាតិនេះ និងមានការងារខ្លះទៀត យើងបានធ្វើអំពីជាតិមុនមក ការយល់ដឹងអំពីលទ្ធផលនៃការងារយ៉ាងនេះ រមែងកាត់បន្ថយនូវតណ្ហា ដែលតែងប្រាថ្នាក្នុងវត្ថុទាំងពួង មិនមានទីបំផុតនោះ ឲ្យថយកម្លាំង ហើយញ៉ាំងសេចក្តីសន្តោសឲ្យចម្រើន ព្រោះហេតុតែការបានយល់ដឹងនោះឯង ។ មនុស្សយើងត្រូវតែយកចិត្តទុកដាក់ចំពោះការងារ ដកស្រង់ចេញពីសៀវភៅ " មនុស្សជាមួយនឹងការងារ " រៀបរៀងដោយ លោកគ្រូអគ្គបណ្ឌិតធម្មាចារ្យ ប៊ុត-សាវង្ស ដោយ៥០០០ឆ្នាំ |
Articles you may like
