អានអត្ថបទ
ផ្សាយ : ០៦ ឧសភា ឆ្នាំ២០២៣ (អាន: ១៤,២០៨ ដង)
រឿងឧបនន្ទសក្យបុត្តត្ថេរ
|
|
|
រឿងឧបនន្ទសក្យបុត្តត្ថេរ
(ធ. ខុ.) (មុននឹងប្រដៅគេ ត្រូវប្រដៅខ្លួនឯងជាមុនសិន) សេចក្តីដំណាលថា ព្រះឧបនន្តជាអ្នកជំនាញខាងការសម្តែងធម្មទេសនា ។ ពួកភិក្ខុជាច្រើនអង្គ បានស្តាប់ធម្មទេសនា ដែលសម្តែងពីអប្បិច្ឆិតាគុណ (សេចក្តីប្រាថ្នាតិច) របស់ព្រះថេរះអង្គនោះ ក៏បានបូជាត្រៃចីវរ និងសមាទានធុគង្គក្នុងសំណាក់លោក ក្នុងសម័យមួយ ជាសម័យជិតចូឡព្រះវស្សា ព្រះឧបនន្ត បាននិមន្តទៅកាន់វត្តមួយក្នុងជនបទពួកភិក្ខុសាមណេបានឃើញហើយ បានប្រគេនកុដិមួយឲ្យគង់នៅដោយសេចក្តីរាប់អានថា ជាធម្មកថិកដ៏ប៉ិនប្រសព្វមួយអង្គ ។ ព្រះឧបនន្ទសួរភិក្ខុសាមណេរថា ក្នុងវត្តនេះគេប្រគេនសាដកមួយអង្គប៉ុន្មាន? " ប្រគេនមួយអង្គពីរ" ក៏ផ្ញើរឈើច្រត់ទុកក្នុងអាវាសនោះទៀត ហើយទៅកាន់អាវាសទី៣ និងទី៤ ក៏ផ្ញើរក្អមទឹកក្នុងអាវាសទី ៣ ខ្លួនឯងទៅកាន់វស្សាក្នុងអាវាសទី៤ហើយសម្តែងធម្មិកថាទូន្មានឧបាសក សិកា និងភិក្ខុសាមណេរក្នុងអាវានោះទៅ ។ លុះចេញវស្សាហើយ ក៏ផ្ញើរបណ្តាំទៅឲ្យភិក្ខុសាមណេរ ក្នុងអាវាសទី១ ទី២ និងទី៣ ផ្ញើរសាដកមកលោក ដោយសំអាងថា លោកបានផ្ញើរទ្រនាប់ជើង ឈើច្រត់ និងក្អមទឹកឲ្យចាំវស្សាជំនួសភិក្ខុសាមណេរក៏ផ្ញើរសាដកតាមបណ្តាំ ។ ព្រះថេរៈអង្គនោះ ប្រមូលសាដកបានផ្ទុកពេញរទេះបរទៅតាមផ្លូវ បានជួបនឹងភិក្ខុពីរអង្គកំពុងជជែកគ្នាពីរឿងសំពត់សាដក និងសំពត់កម្ពលដែលចែកគ្នាពុំដាច់ស្រេច ក៏សូមឲ្យជួយធ្វើជាអាជ្ញាកណ្តាល ឯភិក្ខុទាំងពីរអង្គ យល់ព្រមឲ្យព្រះថេរៈឧបនន្ទធ្វើជាមេចំណែក ។ ព្រះថេរៈនោះដាក់កតិកាសញ្ញា ថាបើលោកទាំងពីរធ្វើតាមបញ្ជាខ្ញុំ ទើបខ្ញុំព្រមធ្វើជាមេចំណែក ភិក្ខុទាំងនោះក៏ព្រមធ្វើតាម ហើយព្រះថេរៈចែកសាដកនោះឲ្យភិក្ខុមួយចំហៀងមួយអង្គ ខ្លួនលោកត្រូវបានសំពត់កម្ពល រួចយកសំពត់ផ្ទុកលើរទេះបរចេញទៅ ។ ឯភិក្ខុទាំងពីរអង្គឃើញដូច្នោះ កើតវិប្បដិសារីក្តៅក្រហាយស្តាយក្រោយ ឈរសម្លក់មុខគ្នាទៅវិញទៅមកអស់គំនិត មិនដឹង បើនឹងគិតយ៉ាងណា ម្ល៉ោះហើយទៅជាអាក់អន់ចិត្តចំពោះឧបនន្ទត្ថេរនោះពន់ពេក ទើបយកពត៌មាននេះទៅថ្វាយព្រះសាស្តា ។ ព្រះសាស្តាទ្រង់ត្រាស់ថា ឧបនន្ទនេះបោកបញ្ឆោតអ្នកទាំងពីរ មិនមែនក្នុងបច្ចុប្បន្ននេះទេសូម្បីពីអតីតកាល ក៏ធ្លាប់បោកបញ្ឆោតអ្នកឯងដែរ ទើបនាំអតីតនិទានមួយមកសម្តែងបញ្ជាក់ដូចតទៅ ។ ក្នុងអតីតកាល មានសត្វភេពីរ ភេមួយត្រាច់រកចាប់ត្រីតាមមាត់ច្រាំង ភេមួយមុជចាប់ត្រីក្នុងទឹកជ្រៅ ហើយចាប់បានត្រីឆ្ពិនធំមួយមកហើយបម្រុងចែកគ្នា ភេមួយថាអញមុជទឹកជ្រៅ ត្រូវបានចំណែកខាងក្បាល ឯងត្រូវបានកន្ទុយឯភេមួយពុំយល់ព្រម កំពុងតែអង្គុយជជែកគ្នា ភេទាំងពីរបានឃើញចចកដើរតម្រង់មក ក៏និយាយអង្វថាបពិត្រលោកពុកធំ សូមលោកមេត្តាចែកត្រីនេះដល់យើងខ្ញុំផងមើល! ។ ចចកនិយាយថា បើអ្នកទាំងពីរឲ្យខ្ញុំធ្វើជាមេចំណែក ត្រូវតែស្តាប់បង្គាប់ខ្ញុំ ភេទាំងពីរយល់ព្រម ហើយប្រគល់ត្រីឲ្យទៅចចក ។ ឯចចកទទួលយកត្រី មកវាស់កាត់ជាបីកំណាត់ហើយវាយចំណែកដោយពាក្យថា អ្នកដើរតាមមាត់ច្រាំងត្រូវបានកន្ទុយ អ្នកលុយទឹកជ្រៅ ត្រូវបានក្បាលឯសាច់កណ្តាលត្រូវបានមកខ្ញុំជាមេចំណែក រួចចចកយកចំណែកសាច់កណ្តាលដើរចេញទៅ ។ រីភេទាំងពីរស្តាយជាពន់ពេកឈរមើលមុខគ្នាទៅវិញទៅមក មិនដឹងបើគិតធ្វើយ៉ាងណា ។ លុះចប់ធម្មទេសនា ព្រះសម្ពុទ្ធត្រាស់បញ្ជាក់ថា ភេទាំងពីរគឺ អ្នកទាំងពីរនេះឯង ឯចចកគឺឧបនន្ទភិក្ខុ ដោយទ្រង់បញ្ចប់ក្នុងឃ្លាថា មុននឹងប្រៀនប្រដៅគេ បុគ្គលត្រូវប្រដៅខ្លួនឯងឲ្យបានបទល្អសិន ។ អត្ថបទនេះដកស្រង់ចេញពីសៀវភៅៈ ប្រជុំជាតក វាយអត្ថបទដោយៈ កញ្ញា ជា ម៉ានិត ដោយ៥០០០ឆ្នាំ |
អត្ថបទអ្នកអាចអានបន្ត
