Reading Article
Public date : 22, Sep 2023 (22,305 Read)
គំនិតអ្នករៀនសូត្រ
|
|
|
ការសិក្សារៀនសូត្រមិនមានថ្នាក់បញ្ចប់ ទោះបីយើងមានឋានៈជាគ្រូបង្រៀននូវវិជ្ជាផ្សេងៗក៏ដោយ ប៉ុន្តែពេលខ្លះយើងក៏សិក្សាដែរកាលបើយើងជាសិស្ស តើយើងត្រូវធ្វើយ៉ាងណា? គឺយើងត្រូវបន្ទាបខ្លួនបង្អោនចិត្ត ព្រមទទួលស្ដាប់នូវពាក្យណែនាំ និង ពាក្យដាស់តឿនរបស់មនុស្សផ្សេងៗ ដែលគេនិយាយឲ្យយើងស្ដាប់ មានមនុស្សខ្លះចរឹតរឹងរូស និងបង្អោនចិត្ត ព្រមទទួលស្ដាប់នូវពាក្យណែនាំ និង ពាក្យដាស់តឿនរបស់មនុស្សផ្សេងៗ ដែលគេនិយាយឲ្យយើងស្ដាប់ មានមនុស្សខ្លះចរិតរឹងរូស មិនបង្អោនចិត្តដើម្បីស្ដាប់ពាក្យអ្នកដទៃ គឺចូលចិត្តតែខាងនិយាយឲ្យគេស្ដាប់ប៉ុណ្ណោះ។
មនុស្សដែលជាអ្នកនិយាយល្អនោះ ត្រូវតែជាអ្នកស្ដាប់ដោយល្អផង ចំណុចនេះសំខាន់ណាស់ សូម្បីព្រះសម្មាសម្ពុទ្ធជាអង្គម្ចាស់ក៏ព្រះអង្គស្ដាប់សាវ័កសម្ដែងធម៌ដែរ គឺព្រះអង្គស្ដាប់ដោយការគោរពព្រះធម៌ ដូច្នេះក្នុងសេចក្ដីនេះ កាលណាគេឲ្យយើងនិយាយ យើងក៏និយាយ ប៉ុន្តែកាលណាដល់កពេលយើងស្ដាប់ យើងត្រូវស្ដាប់ដោយសេចក្ដីគោរព នេះគេហៅថាគំនិតអ្នកសិក្សា រៀនសូត្រ ស្ដាប់ហើយមានការយលល់ខុសត្រូវ ឬ យល់ត្រូវយ៉ាងណា នៅលើមនសិការរបស់យើងទេ មនុស្សយើងបើមិនព្រមស្ដាប់ពាក្យអ្នកដទៃនិយាយផងទេនោះ គឺដូចជាបិទទ្វាបិទបង្អួចផ្ទះអ៊ីចឹងឯង វារមែងងងឹតជាធម្មតា បើយើងបើកទ្វាបើកបង្អួច ពន្លឺរមែងចូលមកក្នុងផ្ទះយ៉ាងណា ជីវិតយើងក៏ដូចគ្នា បើយើងមិនទទួលការចេះដឹងអំពីអ្នកដទៃហើយ វាមិនមានអ្វីបន្ថែមលើការចេះដឹងរបស់យើងឲ្យរឹតតែភ្លឺស្វាងឡើងឡើយ ហើយយើងក៏មិនរឹងរឹតតែឆ្លាតទៀតបានដែរ ដូច្នេះ យើងត្រូវតែទទួលស្ដាប់ពាក្យអ្នកដទៃនិយាយផង ដោយស្មារតីប្រុងប្រយ័ត្ន និង យកចិត្តទុកដាក់បំផុត ទោះបីអ្នកនិយាយនោះយើងគិតថា គេមិនមានការសិក្សាយ៉ាងណាក៏ដោយតែពេលខ្លះគេក៏និយាយគួរស្ដាប់ដូចគ្នា គេនិយាយតាមការយល់របស់គេ តាមការចូលចិត្តរបស់គេ សូម្បីក្មេងតូចៗ ពេលខ្លះក៏និយាយគួរឲ្យយកចិត្តទុកដាក់ពិចារណាផងដែរ។ មិនចាំបាច់តែសំដីមនុស្សទេ អ្វីៗទាំងអស់ដែលមានក្នុងពិភពលោកនេះ ជាពិសេសនៅជុំវិញខ្លួនយើងសព្វថ្ងៃ គឺសុទ្ធតែគួរដល់ការសិក្សារៀនសូត្រទាំងអស់ព្រោះជាធម្មជាតិ អាចឲ្យយើងយល់ដឹងក្នុងរឿងជីវិតបាន បើយើងយកចិត្តទុកដាក់សិក្សាពិចារណារឿយៗ។ យើងសិក្សាអំពីធម្មជាតិ ក្នុងធម្មជាតិមានខន្ធ ៥ មានអាយតនៈ ១២ ធាតុ ១៨ ទាំងអស់នេះសុទ្ធតែជាមេរៀនសំខាន់ៗដែលគួរដល់ការសិក្សា ហើយក្នុងធម្មជាតិ មានហេតុផលបញ្ជាក់ប្រាប់ការពិត ដើម្បីជាគ្រឿងចម្រើនបញ្ញា ប៉ុន្តែបើសិក្សាយល់ខុសអំពីហេតុផល នាំឲ្យមានមិច្ឆាទិដ្ឋិផ្សេងៗ។ ព្រះសម្មាសម្ពុទ្ធទ្រង់ត្រាស់សម្ដែងអំពីមិច្ឆាទិដ្ឋិរបស់មនុស្សទាំងឡាយ ព្រមទាំងមិច្ឆាទិដ្ឋិរបស់ទេវតា និង មិច្ឆាទិដ្ឋិរបស់ព្រហ្មទៀតផង ព្រះអង្គទេសនាពន្យល់សត្វលោកសព្វគ្រប់ ព្រះអង្គត្រាស់សម្ដែងអំពីសង្ខារធម៌គ្រប់យ៉ាងដែលមានក្នុងលោក អ្វីជាគុណ អ្វីជាទោស អ្វីដែលមានប្រយោជន៍ និង អ្វីដែលមិនមានប្រយោជន៍ ហើយសម្មាទិដ្ឋិនោះយ៉ាងណា ព្រះអង្គទ្រង់ត្រាស់សម្ដែងទាំងអស់ ដូច្នេះយើងត្រូវយកចិត្តទុកដាក់សិក្សារៀនសូត្ររាល់ថ្ងៃ ដើម្បីកសាងខ្លួន ឲ្យបានប្រសើរឡើង។ មនុស្សយើងភាគច្រើនណាស់ ដែលយល់ខុសក្នុងមង្គលនៃជីវិត តែងប្រកាន់មង្គលនៅលើថ្ងៃខែឆ្នាំ ឬ ពេលវេលា ប្រកាន់ចំពោះទៅលើវត្ថុផ្សេងៗ ទីកន្លែង ។ល។ ព្រះសម្មាសម្ពុទ្ធទ្រង់ត្រាស់សម្ដែងមង្គលជីវិតមាន ៣៨ប្រការ គួរមនុស្សគ្រប់គ្នាសិក្សាឲ្យបានយល់ដឹង ដើម្បីសុភមង្គលនៃជីវិតខ្លួនឯងផ្ទាល់ផង សុភមង្គលនៅក្នុងគ្រួសារផង ប្រទេសជាតិបានចម្រើនជឿនលឿនផង។ ដកស្រង់ចេញពីសៀវភៅ សិក្ខាបទមនុស្សល្អ ដោយ៥០០០ឆ្នាំ |
