Reading Article
Public date : 16, Oct 2021 (16,325 Read)
អនិសង្ឃអធិវាសនក្ខន្តី
|
|
|
អនិសង្ឃអធិវាសនក្ខន្តី
អធិវាសនក្ខន្តីនេះ លោកសរសើរដោយអនេកបរិយាយមានដើមថា៖ សីលសមាធិគុណានំ ខន្តិ បធានការណំ សព្វេបិ កុសលាធម្មា ខន្ត្យាយេវ វឍ្ឍន្តិ តេ សេចក្ដីអត់ធន់ ជាហេតុជាទីតាំងនៃគុណ គឺសីលនិងសមាធិទាំងឡាយ, ធម៌ទាំងឡាយជាកុសលទាំងអស់នោះ តែងចម្រើនដោយសេចក្ដីធត់ធន់មែនពិត។ កេវលានំបិ បាបានំ ខន្តិ មូលំ និកន្តតិ គរហកលហាទីនំ មូលំ ខនតិ ខន្តិកោ សេចក្ដីអត់ធន់ តែងកាត់បង់បាននូវឫសនៃបាបទាំងឡាយទាំងអស់, បុគ្គលអ្នកអត់ធន់ ឈ្មោះថាជីករំលើងនូវឫសនៃទោសទាំងឡាយ មានពាក្យតិះដៀល និងការឈ្លោះប្រកែកជាដើម។ ខន្តិ ធីរស្សលង្ការោ ខន្តិ តបោ តបស្សិនោ ខន្តិ ពលំ វ យតីនំ ខន្តិ ហិតសុខាវហា សេចក្ដីអត់ធន់ ជាគ្រឿងអលង្ការរបស់អ្នកប្រាជ្ញ សេចក្ដីអត់ធន់ ជាគ្រឿងដុតបង់នូវបាបរបស់អ្នកដែលមានតបធម៌, សេចក្ដីអត់ធន់ជាកម្លាំងរបស់អ្នកប្រព្រឹត្តធម៌, សេចក្ដីអត់ធន់ ជាគុណជាតិនាំមកនូវប្រយោជន៍ និងសេចក្ដីសុខ។ ខន្តិកោ មេត្តវា លាភី យសស្សី សុខសីលវា បិយោ ទេវមនុស្សានំ មនាបោ ហោតិ ខន្តិកោ អ្នកអត់ធន់ ជាអ្នកមានមិត្តសម្លាញ់ ជាអ្នកមានលាភជាអ្នកមានយស ជាអ្នកមានសេចក្ដីសុខជាប្រក្រតី, អ្នកអត់ធន់រមែងជាទីស្រឡាញ់ជាទីគាប់ចិត្តនៃទេវតា និងមនុស្សទាំងឡាយ។ អត្តនោបិ បរេសញ្ច អត្ថាវហោ វ ខន្តិកោ សគ្គមោក្ខគមំ មគ្គំ អារុឡ្ហោ ហោតិ ខន្តិកោ អ្នកអត់ធន់ ជាអ្នកនាំមកនូវប្រយោជន៍ដល់ខ្លួនផង ដល់ជនទាំងឡាយឯទៀតផង, អ្នកអត់ធន់ ជាអ្នកឡើងកាន់ផ្លូវជាទីទៅស្ថានសួគ៌ និងព្រះនិព្វាន។ សត្ថុនោ វចនោវាទំ ករោតិយេវ ខន្តិកោ បរមាយ ច បូជាយ ជិនំ បូជេតិ ខន្តិកោ អ្នកអត់ធន់ ឈ្មោះថាធ្វើតាមនូវព្រះពុទ្ធដីកាជាឱវាទនៃព្រះសាស្ដាមែនពិត, អ្នកអត់ធន់ ឈ្មោះថាបូជានូវព្រះពិជិតមារដោយការបូជាដ៏ឧត្ដម។ លោកសរសើរខន្តីមានន័យផ្សេងៗ ច្រើនយ៉ាងដោយការដូច្នេះ; តែក្នុងឱវាទបាតិមោក្ខគាថានេះ ព្រះសម្មាសម្ពុទ្ធរាល់ព្រះអង្គទ្រង់សម្ដែងសរសើរគុណរបស់ខន្តីថា បរមំ តបោ តីតិក្ខា ជាតបធម៌ដ៏ឧត្ដម តែ ១ បទប៉ុណ្ណោះ។ ដកស្រង់ចេញពីសៀវភៅ ឱវាទបាតិមោក្ខ ដោយ៥០០០ឆ្នាំ |
