ពាក្យថាបព្វជិត

បុគ្គលដែលសម្លាប់ឬបៀតបៀនគេតាមអំពើចិត្ត ដែលឥតអធិវាសនក្ខន្តី នោះ ដោយហោចទៅ សូម្បីតែសម្លាប់សត្វតូចៗ មានល្បោមនិងមូសជាដើម ឲ្យវិនាសចាកជីវិត ក៏ហៅថា បព្វជិត មិនកើត។

ព្រោះហេតុអ្វីបានជាពោលដូច្នោះ?

ព្រោះហេតុមិនទាន់បណ្ដេញបំបរមន្ទិលនៅឡើយ, លុះតែជាអ្នកបណ្ដេញបំបរមន្ទិលចោលចេញ ទើបហៅថា បព្វជិត បាន, ដូចមានពុទ្ធភាសិតថា៖

បញ្វជយមត្តនោ មលំ តស្មា បព្វជិតោតិ វុច្ចតិ

សេចក្ដីថា អ្នកដែលបណ្ដេញបំបរនូវមន្ទិលរបស់ខ្លួនឲ្យឃ្លាតចេញបាន ទើបតថាគតហៅថា បព្វជិត ដោយហេតុដែលគេបណ្ដេញបំបរនូវមន្ទិលនោះឯង។ កាលដែលបណ្ដេញនូវមន្ទិលជាលក្ខណៈគ្រឿងសម្គាល់របស់បព្វជិត។

អ្វីហៅថា មន្ទិល?

កិលេសដែលធ្វើចិត្តឲ្យសៅហ្មង ដូចវត្ថុពណ៌ខ្មៅ មានធ្យូងជាដើម ដែលធ្វើរបស់ស្អាតឲ្យប្រឡាក់ខូចទៅ លោកហៅថា មន្ទិល។

មន្ទិលមាន ៩ ប្រការ

១. កោធ សេចក្ដីក្រោធខឹង
២. មក្ខ សេចក្ដីលុបគុណគេ
៣. ឥស្សា សេចក្ដីច្រណែន
៤. មច្ឆរិយ សេចក្ដីកំណាញ់
៥. មាយា លាក់ពុតកំហូច
៦. សាថេយ្យ សេចក្ដីអួតអាង
៧. មុសា សេចក្ដីកុហក
៨. បាបិច្ឆ សេចក្ដីប្រាថ្នាលាមក
៩. មិច្ឆាទិដ្ឋិ សេចក្ដីយល់ឆ្វេងអំពីការពិត។

បណ្ដាលអកុសលទាំង ៩ នេះ, កាលបើអកុសលណាមួយកើតឡើងហើយ ក៏ធ្វើចិត្តឲ្យកករល្អក់មិនជ្រះថ្លា; ហេតុដូច្នោះបានជាលោកហៅថា "មន្ទិល" ; អ្នកដែលកំចាត់បង់មន្ទិលក្នុងខ្លួនឲ្យអស់ទៅបាន ទើបគួរហៅថា បព្វជិត មែន; ទោះបីកំចាត់បង់មិនទាន់បានទាំងអស់ តែតាំងចិត្តប្រុងនឹងកំចាត់បង់ឲ្យអស់តទៅ ក៏គួរហៅថា បព្វជិត បានដែរ។ ឯបុគ្គលដែលសម្លាប់សត្វដទៃ ឬបៀតបៀនសត្វដទៃ ក៏ព្រោះតែមន្ទិលទាំងនេះជ្រកសម្ងំនៅក្នុងសន្ដានទាំងអស់។

ន័យមួយទៀត បព្វជិត ប្រែថា " អ្នកវៀរ " គឺវៀរចាកទោសដែលព្រះសម្មាសម្ពុទ្ធជាម្ចាស់ទ្រង់ឃាត់មិនឲ្យធ្វើ តាំងអំពីវៀរចាក មេថុនធម្ម, អទិន្នាទាន, មនុស្សវិគ្គហៈ និងឧត្តរិមនុស្សធម្ម ជាដើមទៅ, ព្រោះអំពើ ៤ យ៉ាងនេះ ជាហេតុនាំឲ្យប្រទូស្ដ និងបៀតបៀនអ្នកដទៃ។ បុគ្គលចំពូកខ្លះ អាស្រ័យមេថុនធម្មជាហេតុ ក៏ប្រទូស្ដនិងបៀតបៀនគ្នា ដរាបចាក់កាប់សម្លាប់គ្នាជាទីបំផុតក៏មាន; បុគ្គលចំពូកខ្លះ ចង់បានទ្រព្យរបស់គេ ក៏ប្រទូស្ដនិងបៀតបៀនម្ចាស់ទ្រព្យគេក៏មាន; និងសេចក្ដីគោរពរាប់អានអំពីអ្នកដទៃ ក៏និយាយបញ្ឆោតគេដោយឧត្តវិមនុស្សធម្មក៏មាន ; អំពើអម្បាលនេះជាដើម ហៅថាប្រទូស្ដ ថាបៀតបៀនអ្នកដទៃ, ជាអករណីកិច្ចដែលព្រះភគវន្តមុនីបរមគ្រូជាម្ចាស់ទ្រង់ហាមប្រាមអ្នកបួសក្នុងព្រះពុទ្ធសាសនាមិនឲ្យធ្វើជាដាច់ខាត។ ហេតុនោះ បុគ្គលដែលឋិតនៅក្នុងភេទជាបព្វជិត គួរតែវៀរចាកទោសដែលទ្រង់បញ្ញត្ត ខំប្រតិបត្តិតាមគុណដែលទ្រង់អនុញ្ញាត, បើមិនវៀរចាកទោសដែលទ្រង់បញ្ញត្តដូចសំដែងមកនេះទេ នឹងហៅថា បព្វជិត ដូចម្ដេចបាន។

ដកស្រង់ចេញពីសៀវភៅ ឱវាទបាតិមោក្ខ
ដោយ៥០០០ឆ្នាំ

Array
(
    [data] => Array
        (
            [0] => Array
                (
                    [shortcode_id] => 1
                    [shortcode] => [ADS1]
                    [full_code] => 
                )

            [1] => Array
                (
                    [shortcode_id] => 2
                    [shortcode] => [ADS2]
                    [full_code] => c
                )

        )

)

ពាក្យ​ថា​បព្វជិត

ពាក្យថាបព្វជិត