Reading Article
Public date : 03, Nov 2022 (25,423 Read)
រឿងនាងអសិតាភូ
|
|
|
រឿងនាងអសិតាភូ
(ការប្រាថ្នាហួសហេតុ នាំឲ្យអន្តរាយ) កាលកន្លងទៅហើយ មានព្រះរាជបុត្រព្រះចៅពារាណសី មួយព្រះអង្គ ព្រះរាជបិតាមិនគាប់ព្រះរាជហឬទ័យទ្រង់បំបរបង់ចាកព្រះរាជនិវេសន៍ បាននាំព្រះរាជទេពីរបស់ទ្រង់ ព្រះនាម អសិតាភូ ចូលទៅនៅក្នុងព្រៃហេមពាន្ត សោយត្រីសាច់និងផ្លែឈើ មើមឈើ ជាអាហារ។ ព្រះនាងអសិតាភូ ជាព្រះទេពី ខំគោរពប្រតិបត្តិបំរើដោយឥតមានធ្វេស ប្រហែសឡើយ។ ថ្ងៃមួយព្រះរាជបុត្រ ជាព្រះភស្ដានាងបានឃើញកិន្នរី មានរូបឆោមល្អក៏លះបង់ចោលព្រះនាងខំស្វះស្វែងទៅតាមកិន្នរីនោះ។ ព្រះនាងគិតថាឥឡូវនេះ ព្រះរាជបុត្រមិនអើពើ នឹងអញស៊ូទៅតាមនាងកិន្នរីវិញ លុះគិតហើយក៏ចូលទៅរក តាបសម្នាក់សុំរៀនចំរើនកសិណ មិនយូរប៉ុន្មានក៏ញ៉ាំងឈាននឹងអភិញ្ញាឲ្យកើតឡើង ទើបទៅនៅក្នុងបណ្ណសាលារបស់ខ្លួនវិញ។ ព្រះរាជបុត្រកាលបើរកផ្លូវទៅតាម នាងកិន្នរីមិនឃើញហើយក៏អស់សង្ឃឹម ក៏ត្រឡប់មករកព្រះនាងវិញ។ ព្រះនាងអសិតាភូ ឃើញព្រះរាជបុត្រមកវិញហើយ ក៏ហោះទៅព្ធដ៏អាកាស ទៅនៅក្នុងទីដទៃទៀត។ ព្រះរាជបុត្រកាលបើព្រះទេពីលះបង់លែងត្រូវការ ហើយក៏ខ្សឹក ខ្សួល ទួញយំ សង្រេង សង្រៃថាៈ អត្រិច្ឆំ អតិលោភេន អតិលោភមតេន ច ឯវំ ហាយតិ អត្ថម្ហា អហំវ អសិតាភុយា។ សេចក្ដីថាៈ បុគ្គលដែលប្រាថ្នាហួសកំរិត ចង់បានខ្លាំងពេកព្រោះស្រវឹងងប់ងល់ដោយចំណង់រមែងសាបសូន្យចាកប្រយោជន៍ យ៉ាងណាខ្ញុំឯងកាលប្រាថ្នា ក៏ទៅជាអ្នកសាបសូន្យចាកប្រយោជន៍យ៉ាងណា ខ្ញុំឯងកាលប្រាថ្នា ក៏ទៅជាអ្នកសាបសូន្យចាកព្រះទេពី ឈ្មោះ អសិតាភូយ៉ាងនោះដែរ។ ព្រះរាជបុត្រពីថ្ងៃនោះមក នៅក្នុងព្រះតែម្នាក់ឯង លុះអំណោះឥតអំពីព្រះរាជបិតាទៅបានសោយរាជ្យជាស្ដេចស្នងអង្គព្រះបិតា។ គ្រានោះមាន ទេវតាមួយអង្គបានសូត្រគាថាថ្វាយព្រះសណ្ដាប់ថាៈ អត្រិច្ឆំ អតិលោភេន អតិលោភមតេន ច ឯវំ សោ ហាយតត្កានំ ចន្ទំវ អសិតាតុយា។ សេចក្ដីថាៈ បុគ្គលដែលប្រាថ្នាហួសកំរិត ចង់បានខ្លាំងពេក ព្រោះស្រវឹងងប់ដោយ ចំណង់បុគ្គលនោះរមែងញ៉ាំងប្រយោជន៍ របស់ខ្លួនឲ្យសាបសូន្យយ៉ាងនេះ ដូចជា ព្រះរាជបុត្រកាលប្រាថ្នានូវនាងកិន្នរីឈ្មោះចន្ទាហើយ ជាអ្នកសាបសូន្យចាកព្រះទេពី ឈ្មោះ អសិតាភូ។ ព្រះរាជាទ្រង់អៀនខ្មាស ហើយតាំងព្រះទ័យលែងប្រព្រឹត្តយ៉ាងនោះតទៅទៀងទ្រង់គ្រងរាជសម្បត្តិជាសុខក្សេមក្សាន្តដរាបទៅ។ ដកស្រង់ចេញពីសៀវភៅ ខំសាងកុសល ដោយ៥០០០ឆ្នាំ |
