Reading Article
Public date : 09, Apr 2023 (42,638 Read)
មិនគួរមើលងាយបាបថា មានប្រមាណតិច
|
|
|
បាបវគ្គ
បុគ្គល មិនគួរមើលងាយបាបថា មានប្រមាណតិច នឹងមិនឲ្យផលដូច្នេះឡើយ ប្រៀបដូចក្អមទឹក រមែងពេញបានដោយតំណក់ទឹកដែលធ្លាក់ចុះមក ។ បុគ្គលពាល កាលសន្សំបាប សូម្បីបន្តិចម្តង ៗ គង់ពេញបានដែរ ។
បុគ្គល គួរខ្លាច គួរជៀសវាងនូវបាបទាំងឡាយ ឲ្យដូចណាណិជ ដែលមានទ្រព្យច្រើន តែមានគ្នាតិចជៀសវាងផ្លូវដែលគួរខ្លាច ឬដូចជាបុរសប្រាថ្នារស់នៅ ជៀសវាងថ្នាំពិស ដូច្នោះដែរ ។ បើដម្បៅមិនមានក្នុងបាតដៃទេ បុគ្គលគ្បីនាំយកថ្នាំពិសដោយបាតដៃ ថ្នាំពិសមិនអាចជ្រាបចូលទៅកាន់បាតដៃដែលគ្មានដម្បៅបាន យ៉ាងណា បាបរមែងមិនមានដល់បុគ្គលអ្នកមិនធ្វើ យ៉ាងនោះដែរ ។ បុគ្គលណា ជាអ្នកធ្វើបាបកម្មហើយ ទោះបីចូលទៅឰដ៏អាកាស ក្នុងកណ្តាលសមុទ្រ ឬទៅកាន់ចន្លោះភ្នំទាំងឡាយ ក៏មិនអាចរួចចាកបាបកម្ម បានឡើយ ព្រោះប្រទេសលើ ផែនដីដែលបុគ្គលឋិតនៅហើយ គប្បីអាចរួចចាកបាបកម្មបាន នោះមិនដែលមានទេ ។ ដកស្រង់ចេញពីសៀវភៅ ឱវាទព្រះសាស្តាភាគទី ១ បណ្តាំលោកគ្រូ រៀបរៀងដោយៈ វ៉ាង ស៊ីណា ហៅម៉ុម វាយអត្ថបទដោយៈ ឧបាសក សូត្រ តុលា ដោយ៥០០០ឆ្នាំ |
