អានអត្ថបទ
ផ្សាយ : ២៩ មករា ឆ្នាំ២០២១ (អាន: ៣៧,៨២៥ ដង)
ទ្រព្យ ប្រពន្ធ កូន
|
|
|
ទ្រព្យ ប្រពន្ធ កូន គឺជាគ្រឿងជាចំណងទាញឲ្យធ្លាក់ទៅក្នុងអបាយភូមិ៤បាន
ពាក្យថា ប្រពន្ធ មានន័យថា ជាប់ចំណង ចំពាក់ ឆ្វាក់ ដែលចងរឹតរួត។ ទ្រព្យសម្បត្តិទាំងឡាយ កូនទាំងឡាយ គឺសុទ្ធតែជាគ្រឿងចងឬជាចំណងដ៏ស្វិតស្វាញ មិនមែនជាចំណងធូរលុងនោះឡើយ គឺជាចំណងដ៏រឹងមាំមិនងាយនិងដាច់នោះឡើយ។
ខ្ញុំសូមពោលពីរឿងរ៉ាវនៃភរិយាស្វាមីបន្តិចគ្រាន់បានជាបទពិចារណាតទៅ។ បុរសមិននឹងយកស្ត្រីជាភរិយាជាគូប្រចាំជីវិត គឺត្រូវសិក្សាពីតួនាទីខ្លួនឯងសិន ដល់ពេលចាប់គ្នាជាគូជីវិតទៅទើបវាមិនមានទំនាស់និងគ្នា។ គម្រោងនៃការសាងជីវិតមិនមែនចេះតែងាយសាងនោះទេ គឺពិបាកសាងឡើង ឲ្យទៅជាផ្ទះដែលមានសុភមង្គលណាស់ ដូច្នេះបានជាពាក្យចាស់ពោលថា គិតមុន ចាំគូរជាក្រោយ។ ដៃគូជីវិត គឺត្រូវតែស្មើភាពគ្នាទើបបាន បើមិនបានស្មើភាពគ្នាទេ គឺពិតជាមានបញ្ហាប្រចាំដៃគូជីវិតមិនខានឡើយ។ ភាពមិនចុះសម្រុងនឹងគ្នា ក៏ព្រោះតែមិនបានរៀបចំគម្រោងឲ្យបានល្អនោះឯង ក្រក្ដីមានក្ដី មិនក្រក្ដីល្មមក្ដីជាដើម បើបានយល់ថា គម្រោងមិនសមស្របគឺ អត់មានបញ្ហាកើតឡើងឡើយ។ ភរិយាស្វាមី ដែលមានទំនាស់ចងអឃាត និងមានគំនុំសងសឹកទាំងឡាយ ក៏ព្រោះតែគម្រោងនៃការសាងទ្រនំក្ដីសង្ឃឹមនោះមិនបានត្រឹមត្រូវ។ ចលនានៃភរិយាស្វាមី ដែលបានរង្គើឡើងក៏មិនដោយសារនរណាដែរ គឺមកពីខ្លួនឯងទាំងស្រុងនោះឯង មានតែភាពវៃឆ្លាតទេ ដែលអាចទប់ស្កាត់មិនឲ្យរង្គើទៀតបាន។ នេះជាសេចក្ដីតិចតួចដែលខ្ញុំចង់ពោលទៅ ទុកគ្រាន់បានជាទីពិចារណាតទៅ ដល់គូភរិយាស្វាមីគ្រប់គ្នា។ តទៅនេះ នឹង ពណ៌នាពីចំណងដែលចងក្រៀកនឹងទាញទម្លាក់ឲ្យធ្លាក់ទៅក្នុងអបាយភូមិ គឺ បានដល់ភរិយា ទ្រព្យ និងកូន នេះគឺចំណងដ៏រឹងមាំដែលវាចងនិងទាញមនុស្សសត្វទាំងឡាយ ឲ្យធ្លាក់ទៅក្នុងកំណើតអបាយភូមិ ៤។ ខ្ញុំបានឮមិនតិចនាក់ទេ ដែលបានត្អូញត្អែរៀបរាប់ពីទុក្ខលំបាក យ៉ាងនេះមួយ យ៉ាងនោះមួយព្រោះតែមានចំណងចងក្រៀកទុកមិនឲ្យទៅណាកើត។ ការសិក្សាព្រះធម៌ ដែលព្រះដ៏មានព្រះភាគជាម្ចាស់ទ្រង់ត្រាស់សម្ដែងថា ស្រឡាញ់មួយគឺមាននូវសេចក្ដីទុក្ខមួយ។ ហេតុអីបានជាព្រះអង្គត្រាស់ថា ភរិយា កូន ទ្រព្យជាចំណង សូមជ្រាបថា បើមិនស្រឡាញ់ បើមិនហួងហែងទេក្ដីទុក្ខក៏មិនមានដែរ ព្រោះតែការស្រឡាញ់និងហួងហែងទើបមានក្ដីទុក្ខ ក្ដីទុក្ខព្រោះតែមានក្ដីស្រឡាញ់ ទើបវាកើតទៅជាចំណងចងក្រៀកមិនឲ្យរើរួចចេញពីវដ្ដៈទុក្ខនេះបាន។ ព្រះសម្មាសម្ពុទ្ធជាម្ចាស់ កាលទ្រង់នៅជាព្រះពោធិសត្វមានសេចក្ដីប្រឹងប្រែងយ៉ាងខ្លាំង ពេលដែលទ្រង់ស្ដេចយាងទៅសាងផ្នួស ហេតុអ្វីបានជាទ្រង់ព្យាយាម គឺព្រោះតែមាននូវព្រះអគ្គមហេសី និង ព្រះរាហុលមាតាដែលជាទីស្រឡាញ់ កាត់ចិត្តសឹងមិនសូវបាន ទម្រាំតែយាត្រាចេញពីព្រះនគរបាន គឺទ្រង់មានព្រះទ័យលំបាកណាស់ជាដើម នេះគឺជាការបញ្ជាក់ឲ្យពុទ្ធបរិស័ទទាំងឡាយបានយល់ថា ភរិយា កូន ទ្រព្យ នេះគឺជាចំណងមាំណាស់។ មានភរិយាខ្លះ ធ្លាក់នរកព្រោះតែស្វាមីក៏មាន ស្វាមីខ្លះធ្លាក់នរកដោយសារភរិយាក៏មាន មាតាបិតាទាំងឡាយធ្លាក់នរកដោយសារកូនៗក៏មាន។ បាបកម្មដែលលកើតឡើងព្រោះតែចំណងនេះ គឺមិនមែនឲ្យផលតែជាតិនេះទេ គឺច្រើនជាតិអនេកពន់ពេកណាស់ ពុទ្ធបរិស័ទទាំងឡាយប្រហែលជាមិនឆ្ងល់ទេឬថា គ្រាន់តែចំណងអាចធ្វើឲ្យមាននូវពៀរនិងវេរាបាននោះ ត្រង់នេះគឺគួរតែឆ្ងល់ឲ្យបានគ្រប់គ្នា។ ដកស្រង់ចេញពីសៀវភៅ ឃ្លាំងគំនិតដែលគួរសិក្សា ដោយ៥០០០ឆ្នាំ |
