Reading Article
Public date : 19, Sep 2021 (17,169 Read)
យោបល់នាំឲ្យបព្វជិតប្រព្រឹត្តល្អ
|
|
|
យោបល់នាំឲ្យបព្វជិតប្រព្រឹត្តល្អ
បព្វជិតទាំងឡាយគួរជ្រាបថា ការដែលកើតមកជាមនុស្សក៏ក្រ, កើតមកជាមនុស្សហើយមិនវិកលវិការ ជាអ្នករួចចាកបព្វជ្ជាទោសក៏ក្រ, ការដែលរក្សាជីវិតឲ្យរស់នៅ រហូតទល់នឹងបានបព្វជាឧបសម្បទា ក៏ហៅសែនក្រ, បួសហើយនឹងចេះដឹងយល់ធម៌វិន័យថា នេះគួរ នេះមិនគួរ ក៏មិនងារទេ; កាលបើបានផុតស្រឡះអំពីសេចក្ដីក្រីក្រ ដូចពោលមកនេះហើយគួរតែពេញចិត្តថាជាលាភដ៏ប្រសើររបស់អាត្មា មិនគួរធុញទ្រាន់អានឹងពុទ្ធោវាទឡើយ គួរត្រេកអរឲ្យណាស់ហើយខំរៀនសូត្រធម៌វិន័យក្នុងពុទ្ធសាសនាឲ្យមធ្យ័ត និងប្រតិបត្តិតាមឲ្យពេញកម្លាំងចុះ ទើបបព្វជ្ជាឧបសម្បទានោះ មានផលច្រើនធ្វើឲ្យឆាប់ដល់ព្រះនិព្វាន; ទោះបីមិនសម្រេចក្នុងជាតិនេះ, សេចក្ដីដែលប្រតិបត្តិល្អ ប្រតិបត្តិត្រូវនោះ ក៏នឹងតាមជាប់ជានិស្ស័យទៅក្នុងជាតិខាងមុខ។ ម្យ៉ាងទៀត បព្វជិតឬសមណៈដែលចង់ សម្រេចព្រះនិព្វានឆាប់ត្រូវមានខន្តីអត់ទ្រាំឲ្យច្រើន, កុំលុះអំណាច កិលេសដ៏អាក្រក់គ្រោតគ្រាតដែលកើតឡើងដរាបដល់ប្រទូស្ដអ្នកដទៃ ឬបៀតបៀនអ្នកដទៃនោះឡើយ; គួរមានខន្តីជាត្រីមុខ, បើមិនមានខន្តីទេ ចេះតែព្យាបាទឬបៀតបៀនអ្នកដទៃ នោះព្រះបរមគ្រូជាម្ចាស់មិនត្រាស់ហៅថា " បព្វជិត ឬសមណៈ សក្យបុត្រពុទ្ធជិនោរសឡើយ " ។ ពាក្យដែលពន្យល់ឲ្យស្គាល់ធម៌របស់បព្វជិត និងសមណៈដូចពោលមកហើយនេះ រាប់ថាជា ពុទ្ធសាសនា ពាក្យប្រដៅរបស់ព្រះពុទ្ធទាំងឡាយ គឺព្រះពុទ្ធរាល់ព្រះអង្គដែលបានត្រាស់ក្នុងកាលទាំងពួងតែងទ្រង់ប្រដៅដូច្នេះ។ ដកស្រង់ចេញពីសៀវភៅ ឱវាទបាតិមោក្ខ ដោយ៥០០០ឆ្នាំ |
