Reading Article
Public date : 11, Oct 2022 (20,229 Read)
ឧបមារបស់ជីវិត ៧ យ៉ាង
|
|
|
ឧបមារបស់ជីវិត ៧ យ៉ាង
ការប្រៀបធៀបជីវិត ជាមួយរបស់ដែលឃើញពិតតាមធម្មជាតិ គឺ ១. ជីវិត ប្រៀបដូចដំណក់ទឹកសន្សើមជាប់លើចុងស្មៅ កាលដួងសុរិយាចែងចាំងស្មើដល់ដំណក់ទឹក រមែងហួតហែងទៅ ជីវិតមនុស្សក៏ដូចគ្នាដូច្នោះដែរ រមែងរស់នៅមិនយូរ គួរឧស្សាហ៍សាងបុណ្យកុសលទុក ត្រូវមានសតិបញ្ញាជាគ្រឹះគ្រងខ្លួន ។ ២. ជីវិត ប្រៀបដូចពពុះទឹកកាលភ្លៀងធ្លាក់ចុះមក ពពុះទឹក រមែងបែកឡើងរហ័សនៅមិនបានយូរ ។ ៣. ជីវិត ប្រៀបដូចស្នាមឈើគូសចុះទៅក្នុងទឹកគូស ឈើទៅក្នុងទឹកហើយ ទឹករមែងរួមត្រឡប់រកគ្នា បានយ៉ាងលឿនរហ័ស សូម្បីជីវិតក៏នៅមិនបានយូរ ។ ៤. ជីវិត ប្រៀបដូចទឹកហូរធ្លាក់ចុះពីលើភ្នំ មិនអាចនឹងឈប់បាន រមែងហូររុលទៅមុខឆ្ពោះទៅរកទីទាបបន្តបន្ទាប់ ជីវិតក៏ដូច្នោះ មិនអាចតាំងនៅបាន រមែងហូរឆ្ពោះទៅកាន់ទីបំផុត គឺសេចក្តីស្លាប់ ។ ដូចមាន ពាក្យថា (ទីបំផុត បើមិនដុតក៏កប់ ទីចុងបញ្ចប់ បើមិនកប់ក៏ដុតដែរ ) ។ ៥. ជីវិត ប្រៀបដូចជាដុំស្លេស្ម កាលដុំស្លេស្មនៅក្នុងមាត់របស់បុគ្គលណា ហើយក៏ត្រូវស្តោះចោលដោយមិនលំបាក មិនមានអ្នកណាចង់ទុកស្លេស្មឡើយ សូម្បីជីវិតក៏ដូច្នោះដែរ ។ ៦. ជីវិត ប្រៀបដូចជាចំណិតសាច់ដែលឋិតនៅក្នុងខ្ទះ ត្រូវចម្អិនពេញមួយថ្ងៃ រមែងរលួយផុយទៅដោយឆាប់រហ័ស មិនអាចឋិតនៅយូរបាន សូម្បីជីវិតក៏ដូច្នោះដែរ ។ ៧. ជីវិតប្រៀបដូចជាសត្វគោ ដែលនឹងត្រូវសម្លាប់ ដែលត្រូវនាំទៅកាន់ទីពិឃាត គោដើរឈានជំហានមួយៗ ចូលទៅ ក៏ដូចជាមួយការដើរឆ្ពោះទៅកាន់សេចក្តីស្លាប់ដែរ អ្នកសម្លាប់កំពុងរង់ចាំ ជីវិតយើង ក៏កំពុងដើរទៅកាន់សេចក្តីស្លាប់ដូចគ្នា ។ ដូច្នេះ កាលបើមានជីវិតនៅ គួរធ្វើតែសេចក្តីល្អវៀរចាកការធ្វើអាក្រក់ ព្រោះជីវិតខ្លីណាស់ ការស្លាប់ទៅមានតែបុណ្យនិងបាបជាគ្រឿងនាំទៅកាន់សុគតិ ឬទុគ្គតិ ។ ចាក. គម្ពីរឃ្លាំងបរិយត្តិភាគ ១ ទំព័រ ៦២៧ ដកស្រង់ពីសៀវភៅ ឧបោសថសីល រៀបរៀងដោយ ភិក្ខុសីលប្បញ្ញោ ឆៃ សុផល្លី ដោយ៥០០០ឆ្នាំ |
