Reading Article
Public date : 29, Jul 2019 (8,346 Read)
ទឹកភ្នែកស្រីប្ដីប្រមឹក
|
|
|
ទឹកភ្នែកស្រីប្ដីប្រមឹក
កាលបានគ្នាដំបូង សុរាក៏បងមិនចេះផឹក បារីក៏បងមិនចេះជក់ តែពេលនេះអ្វីដែលធ្វើឲ្យទ្រូងភរិយាស្ទើរតែបែកនោះគឺ លោកប្ដីផឹកគ្មានសម្រាក ផឹកយប់ផឹកថ្ងៃ ថ្ងៃណា វេលាណា ក៏ស្រវឹងជោគខ្លួន ហើយពេលស្រវឹងម្ដងៗ មកដល់ផ្ទះ តែងរករឿងប្រពន្ធកូន ដោយអាកប្បកិរិយាគួរឲ្យខ្លាចជាទីបំផុត គាស់រំលើងរឿងអតីតកាលដែលកន្លងហួសទៅហើយ យកមកនិយាយ ដោយសម្លេងខ្លាំងៗ រហូតជេរប្រពន្ធជេរកូនដោយសម្ដីអាក្រក់ៗ ផ្សេងៗ បណ្ដាលឲ្យកើតមានអំពើហិង្សាក្នុងគ្រួសារ។ ភរិយា មួយថ្ងៃឃើញថ្ងៃឃើញតែសម្រក់ទឹកភ្នែក យំនឹកសង្វេគខ្លួនឯង ដែលបានប្ដីជាមនុស្សប្រមឹក ផឹកគ្មានឈប់ឈរ មិនគិតប្រឹងជួយរកទ្រព្យសម្បត្តិទំនុកបម្រុងគ្រួសារឡើយ គិតតែពីទារយកលុយទៅផឹក។ ភរិយាខំប្រឹងរកតែម្នាក់ឯង ទាំងឈឺ ទាំងជា មិនមានថ្ងៃឈប់សម្រាកឡើយ ព្រោះបើរំពឹងទៅលើកូន កូនក៏នៅក្មេងមិនអាចជួយធ្វើការម្ដាយពេញដៃពេញជើងបានទេ តែបើងាករេទៅរំពឹងលោកប្ដី ក៏គ្មានបានការ និងរឹងតែធ្វើឲ្យគ្រាំចិត្តទ្វេឡើង ព្រោះលោកប្ដីស្រវឹងយប់ស្រវឹងថ្ងៃ ការងារអ្វីក៏មិនជួយធ្វើ គ្មានគំនិតគិតជួយភរិយាឡើយ។ ភរិយាកម្សត់ ប្រឹងប្រែងទាំងទឹកភ្នែក ប្រឹងអត់ធន់ចំពោះអ្វីសព្វគ្រប់បែបយ៉ាងដែលកើតឡើង អត់ធន់ចំពោះការងារ អត់ធន់ចំពោះ លោកប្ដីប្រមឹក ដែលរករឿង រាល់ពេលស្រវឹងម្ដងៗ អត់អន់ចំពោះកូនដែលទារនេះទារនោះគ្មានចម្លោះថ្ងៃឡើយ។ ពេលខ្លះភរិយាស្ទើរតែគាំងបេះដូងស្លាប់ម្ដងៗ ទៅហើយ ពេលដែលឮសម្លេងរបស់លោកប្ដីប្រមឹកស្រែកខ្លាំងៗ ពេញផ្ទះ និងឃើញលោកប្ដីផឹកមិនឈប់ឈរបែបនេះ។ លោកប្ដីទាំងឡាយអើយ អាសូរភរិយាផង សូមអង្វរណា ឈប់ផឹកសុរាទៅ...។ ដកស្រង់ចេញពីសៀវភៅ តំណក់ទឹកភ្នែក ដោយ៥០០០ឆ្នាំ |
