Reading Article
Public date : 21, Jul 2021 (85,161 Read)
សេចក្ដីល្អ ពិតមិនស្លាប់
|
|
សេចក្ដីល្អ ពិតមិនស្លាប់
-សួរៈ ពេលលោកឪពុកទទួលអនិច្ចកម្មទៅ សម្រាប់នាងខ្ញុំខ្លួនឯង កាលប្រៀបធៀបសេចក្ដីរលឹកដល់គុណឪពុកម្ដាយ ចិត្តក៏បានចាស់ក្លាឡើង ព្រោះហេតុនោះ ទើបរម្ងាប់សេចក្ដីសោកសៅបានហើយបង្វែរសេចក្ដីសោកសៅនោះ មកជាការព្យាយាមបំពេញតួនាទីទៅ។ ឆ្លើយៈ យ៉ាងណាក្ដី ការធ្វើឲ្យសេចក្ដីសោកសៅធូរស្បើយទៅបាន ត្រូវអាស្រ័យគោលការណ៍ពីរយ៉ាងជាគូគ្នា គឺមួយរលឹកដល់អ្នកស្លាប់ ដល់រលឹកដល់សេចក្ដីល្អ និង ឧបការគុណដែលលោកបានធ្វើទុក នឹកដល់សេចក្ដីស្រឡាញ់ មេត្តា និង សម្ពន្ធភាពដ៏ប្រសើរទាំងឡាយ ហើយបង្អោនទៅរកទីពីរ គឺរលឹកដល់សេចក្ដីស្លាប់ ដែលជារឿងពិតរបស់ធម្មជាតិ។ សូម្បីថាយើងស្រឡាញ់លោកយ៉ាងណាក្ដី យើងក៏មិនអាចហាមឃាត់ច្បាប់ធម្មជាតិរបស់ការពិតនេះបានដែរ។ - ពេលដែលកាត់នូវសេចក្ដីសោកសៅនេះបានហើយ អ្វីដែលនៅសល់គឺសេចក្ដីល្អ ដែលត្រូវនាំយកមកប្រើឲ្យជាប្រយោជន៍នោះគឺធម្មៈ ឬសេចក្ដីល្អរបស់លោក ដែលស្ថិតនៅដ៏ជ្រាលជ្រៅក្នុងចិត្តរបស់យើង ជាសម្ពន្ធភាពមួយសូម្បីតែលោកទទួលអនិច្ចកម្មទៅហើយក្ដី តែសេចក្ដីល្អរបស់លោកមិនបានស្លាប់ ហើយស្ថិតនៅក្នុងចិត្តរបស់យើងជានិច្ច។ - ព្រោះហេតុនោះ សូម្បីឪពុកម្ដាយស្លាប់ តែហាត់ដូចជាមិនស្លាប់ ព្រោះយើងបាននាំយកសេចក្ដីល្អរបស់លោកមកទុកក្នុងចិត្តយើង ដូចលោកនៅជាមួយយើង។ ត្រង់នេះទើបជារឿងសំខាន់យើងកុំទៅជាប់ជំពាក់ក្នុងរូបរាងកាយ ដែលជាសង្ខារ តែគួរពិចារណាដល់សារៈ ក្នុងជីវិតរបស់លោក ដែលជាសេចក្ដីល្អ ឬ ធម្មៈនោះឯង ហើយយើងនាំយកតួរសេចក្ដីល្អនោះមកស្ថិតនៅក្នុងចិត្តរបស់យើង និង សេចក្ដីល្អ ដែលលោកបានធ្វើទុក ក៏មិនបានបាត់ទៅណា គឺនៅនឹងខ្លួនយើងនេះឯងមកជាសាច់ ជាស្បែក ជាខ្លួនរបស់យើង គឺស្ថិតនៅក្នុងដួងចិត្តរបស់យើង។ ការចងចាំ របស់យើង ក៏មិនដិតជាប់នឹងរូបធម៌ ដោយសំគាល់ថា សាបសូន្យអំពីយើងទៅនោះមិនមាន។ ព្រោះកាលរលឹកដល់សារៈនៃជីវិត គឺសេចក្ដីល្អ ដែលលោកបានធ្វើទុក គឺលោកមកនៅ ក្នុងចិត្តយើងគ្រប់ពេល មិនបានឃ្លាតទៅណាឡើយ។ កាលបើយ៉ាងនោះ ចិត្តក៏សប្បាយ។ សួរៈ កាលជួបនឹងហេតុការណ៍ប្រាកដឡើងក្នុងជីវិត ការរលឹកដឹងយ៉ាងនេះ យើងអាចនាំមកបង្រៀនខ្លួនឯង នឹងហ្វឹកហាត់ដើម្បីអភិវឌ្ឍ ដោយគោលការណ៍យ៉ាងណា ទើបការអភិវឌ្ឍនោះបានពេញលេញជាក់ច្បាស់បាន។ -ឆ្លើយៈ នៅអាចពិចារណាបានទៀតថា លោកឪពុក អ្នកម្ដាយ មានសេចក្ដីប្រាថ្នាចំពោះកូន ចង់ឲ្យកូនប្រព្រឹត្តយ៉ាងនេះឬយ៉ាងនោះ។ តែពេលនេះ សេចក្ដីប្រាថ្នារបស់លោកបានចូលស្ថិតនៅក្នុងចិត្តរបស់យើងៗ ត្រូវព្យាយាមបំពេញនូវកិច្ចការផ្សេងៗដូចលោកធ្លាប់បានសង្ឃឹមចំពោះយើង។ បើធ្វើបានយ៉ាងនេះ វាជារឿងគុណធម៌ដែលល្អឥតខ្ចោះ។ ដកស្រង់ចេញពីសៀវភៅ សុភមង្គលគ្រួសារជាសន្តិសុខសង្គម ដោយ៥០០០ឆ្នាំ |
Articles you may like
