ជីវប្រវត្តិ អាចារ្យ សែម សូរ

សែម សូរ
(១៩៣៥ - ១៩៧៥)
ដោយ បណ្ឌិតសភាចារ្យ ឃីង ហុកឌី

កើតនាឆ្នាំ១៩៣៥ នៅក្នុងសង្កាត់ព្រែកក្រឹស ស្រុកកំពង់ត្រាច ខេត្តកំពត។ បិតានាម ជាវ សែម និង មាតានាម ឆាយ អុក ។ សែម សូរ បានបួសរៀនជាភិក្ខុ រហូតដល់រវាងទសវត្សរ៍១៩៦០ ដោយបានទទួល សញ្ញាប័ត្រពុទ្ធិកឧត្តមសិក្សាបឋម ពីពុទ្ធិកសាកលវិទ្យាល័យ ភ្នំពេញ ដែលមានតម្លៃ កម្រឹតស្មើនឹង សញ្ញាប័ត្រមធ្យមសិក្សាទុតិយ អាចចុះឈ្មោះចូលរៀននៅមហាវិទ្យាល័យ អក្សរសាស្ត្រនិងមនុស្សសាស្ត្រនៅសាកលវិទ្យាល័យភ្នំពេញបាន  ក៏អាចប្រឡងចូលធ្វើការក្នុងរដ្ឋបាល បានស្មើនឹងសញ្ញាប័ត្រ មធ្យមសិក្សាទុតិយភូមិ ក្នុងករណីណាដែល ភិក្ខុ សែម សូរ បានលាចាកសិក្ខាបទ មកជាគ្រហស្ថវិញ ។ តាមការប៉ាន់ស្មាន សែម សូរ បានចាកសិក្ខាបទពីសង្ឃ មកជាគ្រហស្ថ នាទសវត្សរ៍១៩៦២ សែម សូរ បានចូលជាសមាជិកក្នុងសមាគមអ្នកនិពន្ធខ្មែរ នៅថ្ងៃ ២៧ ធ្នូ ១៩៦២ នេះដែរ។

នាឆ្នាំ១៩៧០ សែម សូរ បានបញ្ចប់បរិញ្ញាប័ត្រអក្សរសាស្ត្រផ្នែក អក្សរសាស្ត្រខ្មែរ ហើយបានប្រឡងចូលជាប់ក្នុងក្របខណ្ឌក្រសួង យុត្តិធម៌ ធ្វើការក្នុងងារជាសមូហបញ្ជី ដោយមិន អាចប្រឡងជាប់ជានិស្សិតសាស្ត្រាចារ្យភាសានិងអក្សរសិល្ប៍ខ្មែរនៅមហាវិទ្យាល័យគរុកោសល្យបានទេ ព្រោះមិនអាចប្រឡង វិញ្ញាសាមួយបានជាភាសាបារាំង ដោយមិនចេះភាសានេះគ្រប់គ្រាន់ ដោយជំនាន់នោះ ជាឯកទេស២ជាប់គ្នា... ដើម្បីទៅជាសាស្ត្រាចារ្យ ឯកទេសខ្មែរបារាំង ដែលជារនាំងមួយនាំឲ្យនិស្សិតមក ពីពុទ្ធិកសាវិទ្យាល័យ និង វិទ្យាល័យ ដេកាត មិនអាចប្រឡងជាប់ចូលរៀនបាន ជានិស្សិតសាស្ត្រាចារ្យ បារាំងខ្មែរ ឬ ខ្មែរបារាំងទេ ព្រោះត្រូវចេះភាសាទាំង២ នេះជាចាំបាច់។ 

ស្នាដៃសំខាន់៖
-    អនុវចនានុក្រមខ្មែរ
-    វិជ្ជានិពន្ធន៍ខ្មែរចម្រុះ, ប៉ុណ្ណាគារភ្នំពេញ, ១៩៦៣
-    បរមាធិប្បាយអក្សរសាស្ត្រខ្មែរ 
-    អធិប្បាយស្រីហិតោបទេស
-    អត្ថាធិប្បាយមហាវេស្សន្តរជាតក
-    វប្បធម៌ឥណ្ឌា - ខ្មែរ
-    សិក្សារឿងព្រះជិនវង្ស។




សូមអានបន្ថែម ជីវប្រវត្តិសង្ខេប របស់អ្នកនិពន្ធ សមាជិកនៃសមាគម (តាមលំដាប់លេខរៀងចូលមុន ក្រោយ), ភ្នំពេញ, ១៩៧២ និង សៀវភៅ ម៉ុញសារី, សទ្ទានុក្រមអក្សរសិល្ប៍ខ្មែរ, ភ្នំពេញ ។

ដោយ៥០០០ឆ្នាំំ