ព្រះឧត្តមមុនី អ៊ុម-ស៊ូរ ធម្មវិនយរក្ខិតោ

ព្រះឧត្តមមុនី អ៊ុម-ស៊ូរ ធម្មវិនយរក្ខិតោ
អតីតអធិបតីរង ក្រុមជំនុំព្រះត្រៃបិដក

ព្រះឧត្តមមុនី អ៊ុម-ស៊ូរ បានធ្វើមហាពលិកម្មយ៉ាងធំធេង ដើម្បីព្រះពុទ្ធសាសនារហូតដល់ថ្ងៃអវសាននៃជីវិត។
- ព្រះឧត្តមមុនី អ៊ុម-ស៊ូរ  ប្រសូតនៅ ព.ស. ២៤២៤ គ.ស.១៨៨០ នាខេត្តព្រៃវែង។ 
- ព្រះជន្ម ១៦ ឆ្នាំ សាងបព្វជ្ជា ជាសាមណេរ, ព្រះជន្ម ២១ ឧបសម្បទា ជាភិក្ខុ ។
- ភិក្ខុ អ៊ុម-ស៊ូរ និមន្តទៅសំណាក់រៀនបរិយត្តិធម៌ តាមវត្តខេត្តនីមួយៗ ពីកន្លែងមួយ ទៅកន្លែងមួយ ឱ្យតែឮថាទីណាមានគ្រូពូកែ លោកនិមន្តទៅសុំសំណាក់សិក្សាភ្លាម រហូតដល់វត្តឧណ្ណាលោម ក្រុងភ្នំពេញ ក្នុងសំណាក់អាចារ្យ អួន និងព្រះមហាវិមលធម្ម រតន៍ ថោង ។ 
- ភិក្ខុ អ៊ុម-ស៊ូរ មានចំណេះដឹងជ្រៅជ្រះ ភាសាបាលីលោកចេះច្បាស់លាស់ ជាពិសេសព្រះអភិធម្ម លោកយល់អត្ថសេចក្តីជ្រាលជ្រៅណាស់, តាមការលួចដឹងខ្លះៗមកថា ក្នុងសម័យនោះអ្នកដែលជ្រៅក្នុងអភិធម្ម មានតែសម្តេចព្រះធម្មលិខិត ល្វី-ឯម នៅវត្តលង្កា និងព្រះឧត្តមមុនី អ៊ុម-ស៊ូរ នៅវត្តឧណ្ណាលោម នេះប៉ុណ្ណោះ ។ 


         
នៅវស្សាទី ១៧ ព្រះមហាវិមលធម្ម រតន៍ ថោង បានតែងតាំង ភិក្ខុ អ៊ុម-ស៊ូរ ជា ព្រះគ្រូវិមលបញ្ញា។ រហូតដល់ព.ស. ២៤៧២ ត្រូវបានតែងតាំងជាអធិបតីរង នៃក្រុមជំនុំព្រះត្រៃបិដក។ មកដល់ព.ស.២៤៨៣ ត្រូវបានឡើងសមណស័ក្តិជា ព្រះឧត្តមមុនី រាជាគណៈពិសេស ។ 
         
ព្រះឧត្តមមុនី អ៊ុម-ស៊ូរ បានទទួលអនិច្ចធម្ម នៅថ្ងៃសុក្រ ៥ កើត ខែទុតិយាសាឍ ឆ្នាំថោះ ឯកស័ក ព.ស. ២៤៨២ ត្រូវនឹងថ្ងៃទី ២២ ខែកក្កដា ឆ្នាំ ១៩៣៩ នៅវេលាម៉ោង ២ កន្លះ ពាក់កណ្ដាលអធ្រាត្រ ក្នុងព្រះជន្មរវាង ៥៩ ឆ្នាំ ដោយរោគាពាធ។

សូមឧទ្ទិសមហាកុសលប្រគេនចំពោះ ព្រះវិញ្ញាណក្ខន្ធព្រះសព ព្រះឧត្តមមុនី​ សូមបានទៅកាន់សុគតិភពជាភិយ្យោភាព!
ដោយ ភិក្ខុអាយុវឌ្ឍនោ ស្រឿន អូន

ប្រភពៈ ហ្វេសប៊ុក អាយុវឌ្ឍន / Āyuvaḍḍhana
ដោយ៥០០០ឆ្នាំ