Reading Article
Public date : 03, Jun 2022 (22,586 Read)
ព្រះពុទ្ធសាសនាថ្លៃថ្លាជានិច្ច
|
|
|
ព្រះពុទ្ធសាសនាមានលំអបទដើម ដោយការមិនធ្វើនូវបាបទាំងពួង មានលំអបទកណ្តាលដោយការចម្រើនកុសលឲ្យដល់ព្រម មានលំអបទចុងដោយការដុសខាត់សម្អាតចិត្តរបស់ខ្លួន ឲ្យបានជ្រះស្រឡះនូវការលោភលន់ ការខឹងក្រោធនិងការវង្វេងភាន់ច្រឡំ ។
តាំងពីដើមរហូតមកដល់ឥឡូវនេះ ព្រះពុទ្ធសាសនាគឺយ៉ាងនេះឯង ដូច្នេះ សូមកុំមើលឃើញការឆ្គាំឆ្គងរបស់បព្វជិតខ្លះ ឧបាសក ឧបាសិកាខ្លះ ថាជាការឆ្គាំឆ្គងរបស់ព្រះពុទ្ធសាសនាឲ្យសោះ ត្រូវចែកគ្នាឲ្យដាច់ នូវព្រះពុទ្ធសាសនា និងអ្នកកាន់ព្រះពុទ្ធសាសនាយ៉ាងនេះទើបបានជ្រាបច្បាស់ថា " ព្រះពុទ្ធសាសនាថ្លៃថ្លាជានិច្ច " សត្រូវនឹងព្រះពុទ្ធសាសនា ព្រះពុទ្ធសាសនាអប់រំពុទ្ធបរិស័ទឲ្យកម្ចាត់នូវកិលេសគ្រឿងសៅហ្មងក្នុងសន្តានរបស់ខ្លួនឯង កាលបើបុគ្គលណាកម្ចាត់នូវកិលេសក្នុងសន្តានរបស់ខ្លួនអស់រលីងហើយ បុគ្គលនោះឈ្មោះថា ចប់កិច្ចក្នុងបដិបត្តិសាសនា និងឈ្មោះថាបានបម្រើព្រះសម្មាសម្ពុទ្ធហើយ បានតបស្នងសងព្រះគុណរបស់ព្រះអង្គហើយ ដូច្នេះកិលេសមាន លោភៈ ទោសៈ មោហៈ ជាដើម គឺជាសត្រូវនឹងព្រះពុទ្ធសាសនា ។ អ្នកដែលប្រព្រឹត្តតាមអំណាចរបស់កិលេស មិនឈ្មោះថាប្រព្រឹត្តតាមព្រះពុទ្ធសាសនាឡើយ ព្រោះកិលេសជាសត្រូវនឹងព្រះពុទ្ធសាសនា ហើយជាសត្រូវជាមួយនឹងសត្វលោកផងដែរ ។ សត្វលោករមែងមានទុក្ខ មិនរួចចាកទុក្ខព្រោះតែកិលេសក្នុងសន្តាន ទើបគួរឃើញថា ព្រះពុទ្ធសាសនានៅខាងសត្វលោកជានិច្ច ជួយសត្វលោកជានិច្ច គឺជួយកម្ចាត់កិលេសជាសត្រូវឲ្យសត្វលោក ឲ្យកែសត្វលោកព្រមឲ្យព្រះពុទ្ធសាសនាជួយ ។ ទីតាំងនៃព្រះសាសនា សេចក្តីចម្រើននៃព្រះពុទ្ធសាសនាដែលពិតប្រាកដ ក៏គឺសេចក្តីចម្រើនផ្លូវចិត្តនៃពុទ្ធបរិស័ទហ្នឹងឯង ហើយចិត្តរបស់ពុទ្ធបរិស័ទដែលនឹងចម្រើនរុងរឿងទៅបាននោះ ក៏ត្រូវអាស្រ័យព្រះធម៌ក្នុងព្រះពុទ្ធសាសនាជាគ្រឿងចិញ្ចឹមបីបាច់រក្សាជានិច្ចការដែរដូចទារកតូចអាស្រ័យទឹកដោះម្តាយអ៊ីចឹងឯង គឺថាបើយើងយកព្រះធម៌ក្នុងព្រះពុទ្ធសាសនាមកជាអាហារ មកជាគ្រឿងបីបាច់ថែរក្សាទំនុកបម្រុងចិត្តសន្តាន ចិត្តរមែងបានដល់នូវសេចក្តីក្សេមក្សាន្ត ចម្រើនទៅដោយសេចក្តីស្អាត ចម្រើនទៅដោយពន្លឺភ្លឺស្វាង និងចម្រើនទៅដោយសេចក្តីស្ងប់ ។ បើយើងមិនយកព្រះធម៌ក្នុងព្រះពុទ្ធសាសនា មកជាគ្រឿងជួយទំនុកបម្រុងដល់ចិត្តទេ ចិត្តរបស់យើងរមែងមិនចម្រើនទៅដោយសេចក្តីស្អាត និងមិនបានដល់នូវសេចក្តីក្សេមក្សាន្តឡើយវារមែងធ្លាក់ចុះទៅតាមអំណាចនៃសេចក្តីលោភ សេចក្តីក្រោធ សេចក្តីវង្វេង ការច្រណែនឈ្នានីស និងគំនុំគុំគួនព្យាបាទបៀតបៀនមិនចេះចប់ ជាការសាងនូវបញ្ហាឲ្យដល់ជីវិតពិតប្រាកដ គឺជាចិត្តដែលមិនមានព្រះពុទ្ធសាសនានៅជាមួយ ព្រះពុទ្ធសាសនាមិនបានចម្រើននៅក្នុងចិត្តរបស់យើងឡើយ នេះជារឿងដែលគួរគិត ។ ស្រង់ចាកពីសៀវភៅ " ជំនួយសតិភាគ ៧ " រៀបរៀងដោយលោកគ្រូអគ្គបណ្ឌិតធម្មាចារ្យ ប៊ុត សាវង្ស ។ ដោយ៥០០០ឆ្នាំ |
