ស្ពានមាសដ៏រឹងមាំ ឬប្រភពទឹកអណ្តូងធម្មជាតិដ៏ស្រស់បំព្រង

ព្រះសម្មាសម្ពុទ្ធទ្រង់បានត្រាស់សម្តែងថា៖ ទានំ កលុ សភាវេន សគ្គមានុស្សភោគធំ   បរិណាមវាសេនេ ភោគិមុក្ខុបនិស្សយំ ។ ទានតាមធម្មតា អាចផ្តល់ត្រឹមសេចក្តីសុខក្នុងមនុស្សលោកនិងទេវលោក ប៉ុន្តែបើអ្នកប្រាថ្នា និងតម្រង់វាទៅរកព្រះនិព្វាន វានឹងក្លាយជាស្ពានមាសដ៏រឹងមាំ នាំអ្នកឈានទៅដល់ «អមតមហានិព្វាន» ដ៏បរិសុទ្ធ។ ក្នុងនាមយើងជាអ្នកដើរតាមគន្លងធម៌ ហេតុអ្វីបានជាយើងត្រូវបំពេញទាន សីល និងភាវនា? ព្រោះយើងចង់ឱ្យរាល់កុសលធម៌ទាំងអស់នេះ ក្លាយជាកម្លាំងជម្រុញដ៏អស្ចារ្យ ជួយឱ្យយើងរួចចាកទុក្ខ និងសម្រេចបាននូវទីបំផុតដ៏សុខសន្តិភាពក្នុងលោកទាំងបី!

រាល់ពេលដែល បំពេញបុណ្យកុសលដោយតម្រង់ទៅរកព្រះនិព្វាន អ្នកមិនគ្រាន់តែជាអ្នកធ្វើបុណ្យធម្មតានោះទេ ប៉ុន្តែអ្នកកំពុងតែអនុវត្តន៍តាម អរិយមគ្គមានអង្គប្រាំបី ព្រមទាំងបំពេញ ពោធិបក្ខិយធម៌ទាំង៣៧ និង បារមីទាំង១០ យ៉ាងពិតប្រាកដ។ ធម៌ទាំងនេះពិតជាអស្ចារ្យណាស់! គេហៅកុសលដែលអ្នកកំពុងសន្សំនេះថា «ឱបបាតិកកុសល» ដែលជាកុសលដ៏ខ្ពង់ខ្ពស់គ្មានថ្ងៃសាបរលាប។

សូមចងចាំថា កុសលដែលអ្នកបានសន្សំហើយ គឺគ្មានថ្ងៃបាត់បង់តម្លៃឡើយ! វាប្រៀប​បានទៅនឹង ប្រភពទឹកអណ្តូងធម្មជាតិដ៏ស្រស់បំព្រង ដែលមិនថាយើង​ខំ​ដួស​យក​ទៅប្រើប្រាស់ប៉ុណ្ណាក៏ដោយ ក៏ទឹកថ្មីនៅតែហូរផុសឡើងមកជំនួសឥតឈប់ឈរ ធ្វើឱ្យទឹកក្នុងអណ្តូងនោះមិនចេះរីងស្ងួតឡើយ។ ទោះបីជាអ្នកត្រូវទៅសោយសុខក្នុងឋានមនុស្ស ឬឋានទេវតាយ៉ាងណាក៏ដោយ ក៏កម្លាំងបុណ្យនេះមិនធ្លាក់ចុះជាដាច់ខាត វាគឺជារស្មី និងជាកម្លាំង់ ខបនិស្ស័យ ដែលតាមថែរក្សា និងនាំផ្លូវអ្នករហូតដល់គោលដៅចុងក្រោយ! កុំបារម្ភពីទំហំនៃបុណ្យថា តិច ឬច្រើន! មិនថាតូច ឬធំទេ រាល់ពេលដែលអ្នកធ្វើកុសល សូមបង្កប់នូវកម្លាំងចិត្តដ៏រឹងមាំ និងអធិដ្ឋានដោយក្តីជឿជាក់ថា៖ «សូមឱ្យមហាកុសលនេះ ជាបច្ច័យដល់ការត្រាស់ដឹងនូវពោធិញ្ញាណ បានឃើញអរិយសច្ចធម៌ និងបានសម្រេចអមតមហានិព្វានខានពុំខានឡើយ!» ចូរ​ដើរ​លើផ្លូវនេះដោយក្តីក្លាហាន និងក្ដីសង្ឃឹមជានិច្ច ព្រោះរាល់គ្រាប់ពូជនៃកុសលដែលអ្នកកំពុង​ដាំថ្ងៃនេះ គឺសុទ្ធតែជាអនាគតដ៏ភ្លឺស្វាង និងជាជំហានដ៏មុតមាំឆ្ពោះទៅកាន់សេចក្តីសុខដ៏ពិតប្រាកដរបស់អ្នក!



​ព្រះមហាថេរ ណៅឧយ្យានេ អរិយធម្ម (Nauyane Ariyadhamma Mahathera, ១៩៣៩–២០១៦) គឺជាគ្រូកម្មដ្ឋានព្រៃដ៏ល្បីល្បាញរបស់ស្រីលង្កា។ ព្រះអង្គល្បីល្បាញខ្លាំងខាងការកាន់ព្រះវិន័យម៉ឺងម៉ាត់ និងការបង្រៀនសមថៈ-វិបស្សនា ។ ព្រះអង្គ​បានទៅសិក្សាកម្មដ្ឋានស៊ីជម្រៅនៅមជ្ឈមណ្ឌល ប៉ាអ៉ុក (Pa-Auk) ប្រទេសភូមា ហើយបាន​នាំយកវិធីសាស្ត្រប្រតិបត្តិនេះមកផ្សព្វផ្សាយយ៉ាងទូលំទូលាយនៅស្រីលង្កា। ដោយសារបារមី និងចិត្តមេត្តាដ៏ខ្ពង់ខ្ពស់ ព្រះអង្គត្រូវបានអ្នកប្រតិបត្តិទាំងនៅស្រី​លង្កា​ និងភូមា គោរពរាប់អាន និងប្រសិទ្ធនាមថាជា «ព្រះពោធិសត្វ» ទៀតផង។

ប្រភពៈ ហ្វេសប៊ុក Bhikkhu Kassapa
ដោយ៥០០០ឆ្នាំ